news
கவிதை
தாயாய் அரவணைக்கும் கொன்சாகா!

துறவியாக வாழ ஆசை கொண்ட தருணம்

ஆர்வமாய் அரவணைத்த கொன்சாகா தாய்

வழிநடத்திய பாதைகள்… தந்த அனுபவங்கள்….

கற்றுக் கொடுத்த பாடங்கள்… ஏராளம்…ஏராளம்!

 

பிறந்த மண்ணை விட்டு வட மாநிலத்தில்

பணியாற்ற - அதுவும் முதன்முறை

மூன்று சகோதரிகளுடன் பயணித்த

இரயில் பயணம்

நிறைத்தது கண்களை கண்ணீரால்…

அந்தக் கண்ணீரும் ஆனந்த கண்ணீரானது

பெற்ற அனுவங்களால்...

செப்பனிடப்பட்ட தருணங்களால்!

 

புது இடம் புது மொழி

புதுக் கலாச்சாரம் புது உணர்வு

மத மொழி இன வேறுபாடு இருப்பினும்

இறைவனின் அன்பை

குழந்கைகளுக்கு எடுத்துரைக்க

பெரியவர்களை அனுபவித்து உணர வைக்க!

 

இறைவனே இல்லை என்றவர்களின் நம்பிக்கையைத் தட்டியெழுப்ப

வாய்ப்பு மனவலிமை விசுவாசம் - இவற்றை

கற்றுத் தந்தது

எம் கொன்சாகா சபை!

 

இயேசுவை அறிவித்தால் தண்டனை ஒருபுறம்;

இயேசுவை அறியத் துடிக்கும் மக்கள் மறுபுறம்;

இரண்டின் மத்தியில் இறையரசைப் பரப்ப

எம் சபை ஊட்டியது வலுவை

இவ்வலுவுடன் ஆற்றினேன் நற்செய்திப்பணி!

கல்விப்பணியிலும் குழந்தைகளின்

மனத்தில் நற்பண்புகளை விதைத்து

இறை விழுமியங்களை மலரச் செய்து

உண்மையின் பிரதிபலிப்பாக மாற்ற

வாய்ப்பு தந்த எம் கொன்சாகா சபைக்கு

250-ஆம் ஆண்டு கொண்டாடும் இத்தருணத்தில்

எம் சபையை வாழ்த்தி - இன்னும்

பல பணிகளைச் சிறப்பாக செய்ய

இறையருள் வேண்டி இறைஞ்சுகிறேன்!

news
கவிதை
என் வாழ்வில் கொன்சாகா சபை!

சமத்துவத்தின் சாட்சிகள் - 250 ஆண்டுகள்

மாபெரும் கொன்சாகா சபையில் நான் ஓர் அங்கம்.

FSAG எங்கள் இருநூற்றைம்பது ஆண்டு தங்கம்!

 

உள்ளத்தில் உறுதி, உயிருள்ள கொள்கைகள்,

அதனால் நிலைக்கும் எங்கள் உன்னதப் பாதைகள்.

பிறப்பினால் பேதமில்லை, பிரிவினைகள் இல்லை,

சமத்துவம் ஒன்றே  என்றும் எங்களுக்கு எல்லை!

 

சபையின் ஒவ்வொருவரும் சரிசமமாய் நிற்போம்,

அன்பை மட்டுமே அளவுகோலாய்க் கொள்வோம்.

நீதி நிலைத்திருக்கும் எங்கள் கொள்கை;

நியாயத்தின் வழி நடப்பதே எங்கள் வாழ்க்கை!

 

தலைமுறை கடந்தும் காக்கின்றோம் ஒற்றுமையை!

அதுவே எங்கள் வாழ்வுக்கு கடவுள் தந்த முழுமை!

வரலாறு கடந்தும் நாங்கள் வலிமையாய் நிற்போம்!

அந்த நல்ல குணங்களால் இன்னும் சிறப்போம்!

 

சவால்கள் பல கடந்து, சாயாமல் வாழ்கிறோம்!

ஏனெனில் FSAG தந்த மதிப்பைப் போற்றுகிறோம்!

அன்பும் அறமும் எங்கள் இரு கண்கள்!

அதுவே வழிகாட்டும் கலங்கரை விளக்கம்!

 

கொன்சாகாவின் நெறி எங்கள் சுவாசம்!

அதுவே எங்கள் விசுவாசம்!

இன்னும் பல நூற்றாண்டுகள் ஓங்கி வளரட்டும்!

எங்கள் சமத்துவச் சபை எங்கும் ஒளிரட்டும்!

நான் ஒரு கொன்சாகா சபையின் உறுப்பினர்

என்பதில் பெருமிதம் கொள்கிறேன்!

வாழ்க... கொன்சாகா! வளர்க.... கொன்சாகா!

news
கவிதை
கடவுளின் பணியாளர் மைக்கேல் அன்சால்தோ

பாண்டிச்சேரியின் பொற்கரையில்

வானம் பாடும் கடலொலி சேரும் நிலத்தில்,

ஒரு மேய்ப்பன் நடந்தான் மெதுவாய், அமைதியாய் -

அவனின் முகத்தில் கிறிஸ்துவின் அன்பு ஒளிவிட்டது.

 

மனிதர் புகழும் மாலையின்றி,

நம்பிக்கையைக் கையில் தாங்கி வந்தான்;

ஏழைகளிலும் துன்பத்திலும் தாழ்ந்தோரிலும் -

அவன் கண்டான் கிறிஸ்துவின் முகத்தினைத் தெளிவாய்,

 

அனாதை குழந்தைகள், துயர் நெஞ்சங்கள்,

அவனது கரங்களில் அடைந்தன ஆறுதல்;

அவனது கைகள் ஆனது அவர்களின் அன்றாட அப்பம்,

அவனது செபங்கள் ஆனது அவர்களின் இரவின் பாதுகாப்பு,

 

இக்னேஷியஸின் ஒளியில் வழிநடந்தவன்,

கடவுளின் சித்தம் மட்டுமே அவன் வழி;:

அன்பு, பணிவு, உழைப்பு அவனின் அர்ப்பணிப்பு -

கருணையின் பணியாளனாய் வாழ்ந்தான் அவன்!

 

அவனது இதயத்தில் எரிந்தது நித்திய தீபம் -

இளம் அலோசியின் தியாக ஒளி:

அன்பின் தீயாய், தங்கம் போல ஒளிர்ந்த புனித

அன்சால்தோவுக்குப் புனித வழி காட்டினான்!

 

நூற்றாண்டுகள் நீங்கினாலும், பேரரசுகள் மறைந்தாலும்,

அவனது ஆவி இன்னும் கிசுகிசுக்கிறது மெல்ல -

நம்பிக்கை தீயாய், அன்பு விதையாய்,

ஒவ்வொரு சேவையிலும் கடவுள் உயிராய் வாழ்கிறார்!

 

ஓ மைக்கேல், கிறிஸ்துவின் ஏழைகளின் நண்பனே,

உன் ஒளி என்றும் மங்காது நிலைக்கும்;

காலம் அழிக்க முடியாத சுடராக நீ விளங்குவாய் -

கடவுளின் கருணையின் கண்ணாடியாக, நித்தியமாக!

news
கவிதை
கவிதைச் சாரல்கள்

வாழ்க்கை

உன்னை

உலர்த்திக்

காய வைக்கும்

போதெல்லாம்

பிசுபிசுக்கும்

உன் உப்பு வியர்வையில்

உன்னை நீயே

ஆசுவாசப்படுத்திக் கொள்!

உன் வியர்வைச் சிறகுகளை

நனைத்துக் கழுவிட

சாரல் மழை ஒன்று

விரைவில் வருமெனும்

நம்பிக்கையோடு!

 

நாற்காலியின்

கால்கள்

நீள்தலும்

உழைப்பாளியின்

கரங்கள்

சுருங்குதலும்

நீதியின் முரண்!

 

ஆயிரம்

விளக்குகளைக்

கையில் ஏந்தி

வெளிச்சத்தில்

நிற்பதை விட

ஒரு விளக்கைக்

கையில் ஏந்தி

இருளில் நிற்பதே

மேலானது!

 

வலிகளைத்

தாங்கும்

பொறுமையே

வழிகளைக்

கண்டறிவதற்கான

திறமையே!

 

விலை கொடுத்து

வாங்கப்படும்

எதுவும்

விலை

இருக்கும் வரை

மட்டுமே

விலை போகும் !

 

நேசித்தாலும்

நெகிழ்ந்தாலும்

உடைத்தாலும்

நொறுக்கினாலும்

அடித்தாலும்

அவமானப்பட்டாலும்

கவலைப்பட்டாலும்

கலங்கினாலும்

உனக்காகக்

கடைசிவரை

துடிப்பது

உன் இதயம்

மட்டுமே!

 

விலைமதிப்பற்றவை

எல்லாம்

விலை

போகாதவைகளே!

 

கைப்பேசி

உறவுகளுக்காய்

கைக்கெட்டும்

தூரத்தில் உள்ள

உறவுகளைத்

தொலைவில்

நிறுத்திவைத்துத்

தொலைந்ததென்று

தேடுவதையே

எந்த விண்கலம் கொண்டு

ஆராய இயலும்?

 

அவமானம்

உன்னைக்

கூறு போடும்

போதெல்லாம்

பதில் இல்லா

வெகுமானப்

புன்னகையாலே

அதன் மதில்களை

நொறுக்கி விடு!

 

நினைவுகள்

கடினமானவை!

அதனால்தான்

என்னவோ

நகர்ந்துகொண்டே

இருக்கின்றன

கடினப்பட்டுக்

கடந்திட

கால்கள் இன்றி!

 

பிறந்து விட்டோம்

என்பதற்காய்ப்

பொழுதைக் கழிக்காதே!

இனி பிறக்கப் போவதில்லை

என்றே

இறுதிவரை போராடு!

சாதனைகள்

உன் பிறவிப் பயனாகட்டும்!

சரித்திரங்கள் உன் பெயர்

சொல்லட்டும்!

 

நிலவில் சந்திரயான்!

நிலுவையில் ஆதித்யன்!

நிமிர முடியாக் கடனில்

இந்தியன்!

 

பிறருக்கு

நம்பிக்கையைக் கொடுங்கள்!

அதுவே உங்களையும்

வலிமையாக்கும்!

 

தேடப்படாதவை

தொலைந்து போனதாகவே

இருக்கட்டும்

என்று துணிந்து

முன்னேறுவதே

தன்னம்பிக்கையின்

முன்னெடுப்பு!

news
கவிதை
கடந்து போகும் வாசங்கள்!

செப்டம்பர் - 2

எனக்குப் பிறந்த நாள்!

குடும்பத்தார்கள்

உறவுகள், நண்பர்கள்

நினைவூட்டிக் கொண்டாடும்

வயதைக் கடந்துவிட்டேன்.

 

அரசுப் பள்ளிகளைத் தவிர

வேறு எந்த நிறுவனத்திலும்

இயக்கத்திலும்

பணியாற்றியதில்லை.

ஆதரவாளன்.

பங்கேற்பாளன்தான்.

 

என் மகள் அகிலா மட்டும்

எல்லா ஆண்டுகளிலும்

நினைவுகூர்ந்து வாழ்த்துவாள்!

 

65 வயது தொடங்குகிறது.

நினைவுகளில் வந்துபோகும்

சில நூறு முகங்கள்.

அவ்வப்போது

தொடர்பிலிருக்கும்

சில பத்து முகங்கள்.

 

ஆயுளில் ஒரு மாத சிறைவாசம்.

15 வயதில்

இளம் மாணவர் இயக்கத்தில்

தொடங்கிய பொதுவாழ்வு.

சில இயக்கங்களோடு

2025-வரை நீடிக்கிறது.

 

பெரிதாய் ஒன்றும்

கிழித்துவிடவில்லை.

 

வரலாற்றைப் படைத்தவர்கள்

வரலாற்றைப் படைக்கிறவர்கள்!

வரலாற்றைப் படைக்கப்

போகிறவர்கள் ‘அணியில்’

கடைசியில் நிற்கிறேன்.

 

காட்டாற்றைப்போல

கடுகிச் செல்லும்

‘கால’ வெள்ளத்தின்

ஒரு சிறுதுளி நான்.

 

ஏறத்தாழ... 800 கோடிகளில் ...

ஒரு சிறு புள்ளி.

 

நல்லவேளை ...

விழாக்கள், கேளிக்கைகள்

விருந்துகள், விருதுகள், பரிசுகள்,

பந்தாக்கள் இல்லாமலிருப்பது

மிகவும் சுகமானது.

 

அப்படி நடந்தால்

‘போலிகளாய்’ பல

செய்ய வேண்டியிருக்கும்.

வாழ்வில் திருப்தியாய்

ஏராளம் செய்ய

முடியாமல் போனாலும்

சொல்வதற்குச் சில இருக்கின்றன

எனது மூன்று நூல்கள்:

1. வெள்ளந்தி வாத்தியார்

2. மக்கள் இயக்குநர் (எஸ்.பி.ஜனநாதன்)

3. ஆண்டோ எனும் அருங்கலைஞன்.

 

ஏறத்தாழ 20 ஊர்கள்

20 வீடுகளில்

வாழ்ந்திருக்கிறேன்.

10 பள்ளிகளில்

பணி செய்திருக்கிறேன்.

 

இயல்பான, நிலைபெற்ற

வாழ்க்கையில்லை.

ஒரு நாடோடியைப்போல

அலைந்து திரிந்திருக்கிறேன்

அலைக்கழிக்கப்பட்டிருக்கிறேன்.

 

இருந்தாலும் ...

மனம் நிறைவாய்த்தான்

இருக்கிறது.

அரசுப்பணியில் இருந்ததால்

அனைத்தையும் கடக்க முடிந்தது.

 

பெற்றோர் புறக்கணிப்பும்

உறவினர் ஏளனமும்

பின்தொடர்ந்திருந்தாலும்

எழுத்தும் இலக்கும்

என்னைக் காப்பாற்றிவிட்டன.

 

சாதாரண பார்வையில்

தேறவில்லை என்றாலும்

சாதிக்கும் முயற்சிகளில்

இன்னமும் இருக்கிறேன்.

 

என் இளவல்கள்

இன்னும் என்னைக்

கனவுகளோடுதான்

பார்க்கிறார்கள்.

திரும்பிப் பார்க்கிறேன்

திருப்தியாய்தான் இருக்கிறது.

 

எனக்குத் தெரியும்...

மானசீகமாய் வாழ்த்து

சொல்பவர்கள்

கரம் நீட்டி குலுக்க

நினைப்பவர்கள்

ஏதாவது செய்திருக்கலாமோ

என்று எண்ணியவர்கள்

அருகில் இருந்திருக்கலாம்

என்று அன்போடு

ஆசைப்படுபவர்கள்

எல்லாருக்கும் நன்றி!

 

பிரபஞ்சம் அனுமதித்தால்

நாம் மீண்டும்

புன்னகையோடு சந்திப்போம்!

news
கவிதை
இணையவழி இறைசெய்தியாளரே ...!

விளையாட்டில் ஆர்வமும், ஊழியத்தில் ஆனந்தமும் உடையவரே!

சலிப்படைந்தோரையும் விழிப்படைய செய்த இறை இனிமையே!

இளந்தலைமுறையினரில் மகுடமான

இந்நூற்றாண்டின் பெருமையே!

திவ்யநற்கருணை புண்ணியத்தை வாழ்ந்தும்

வாழ்வாக்கவும் முனைந்தவரே!

அதிகதிகமாய் இறை உடனிருப்பில் மகிழ்வு கண்டவரே!

பெற்றோரையே இறைபதம் சேர்ப்பித்த அதிசயமே அற்புதமே!

கணினியைத் தன்வசப்படுத்தி இறைசெய்திக்கு உட்படுத்தியவரே!

ஒவ்வொரு வேளையிலும் ஒவ்வொரு பணியிலும்

நற்கருணை நாதரை நாடியவரே!

ஒப்புரவின் மகத்துவத்தில் உறவாடி உயிர்நாடி

வாழ்ந்த தனிப்பெரு அழகே! எம் இளையோர் மனமாற்றம் பெறவே வாழ்ந்து காட்டிய இளம் புனிதரே!

விண்ணக நெடுஞ்சாலையில் தங்குதடையின்றிப் பயணித்த புனிதரே! உம் எண்ணம்போல் யாம் வாழ துணையாகிடுவீரே

புனித கார்லோ அக்குதிஸ்,

உம் பொன்மொழிபோல் யாம் துலங்க மன்றாடுவீரே....!