ஞாயிறு தோழன்

திருப்பலி முன்னுரை

ஒப்பற்ற செல்வமாகிய ஆண்டவரைப் பற்றி அறிவதே உண்மையான மகிழ்ச்சி என்று வாஞ்சையோடு வருகை புரிந்திருக்கும் உங்கள் அனைவரையும், இயேசுவின் பெயரால் ஞாயிறு திருப்பலிக்கு அன்போடு அழைக்கின்றோம். இயேசுவின் அழைப்பிற்குச் செவிமடுத்து அவரது பிள்ளைகளாக வாழ ஆண்டின் பொதுக்காலம் 28-ஆம் ஞாயிறு நமக்கு அழைப்புவிடுக்கிறது.

இன்றைய நற்செய்தியில் ஆண்டவர் இயேசு  விண்ணரசை ஒரு திருமண விருந்திற்கு ஒப்பிடுகிறார். அரசர் ஒருவர் அனைவரையும் தம் மகனின் திருமண விருந்திற்கு அன்புடன் அழைக்கின்றார்; ஆனால், அழைக்கப்பட்டவர்கள் அந்த அழைப்பைப் பொருட்படுத்தாமல் தங்கள் சொந்த வேலைகளிலும், உலகக் கவலைகளிலும் மூழ்கிச் செல்கின்றனர். இந்த உவமை இறைவனின் அழைப்பு என்பது சிலருக்கானது மட்டுமல்ல; ஒவ்வொருவருக்கும் வழங்கப்படும் அருளின் அழைப்பு என்பதை நமக்கு நினைவூட்டுகிறது. ஒவ்வொரு திருப்பலியும் இறைவனோடு உறவுகொள்ளவும், அவரது விருந்தில் பங்கேற்கவும், நம் வாழ்வை அவருக்கேற்ப மாற்றிக்கொள்ளவும் கிடைக்கும் ஓர் அரிய வாய்ப்பாகும். இயேசுவின் விழுமியங்களை ஆடைகளாக அணிவோம்.  அன்பில்லாத இதயத்திற்கு அன்பின் ஆடை தேவை; மன்னிக்காத இதயத்திற்கு மன்னிப்பின் ஆடை தேவை; பொறாமை கொண்ட இதயத்திற்குத் தூய்மையின் ஆடை தேவை; சுயநலமான இதயத்திற்குத் தியாகத்தின் ஆடை தேவை என்பதை அறிந்து நமது வாழ்க்கைப் பாதையை மாற்ற முயற்சி செய்வோம். இறைவனின் அழைப்பை அலட்சியம் செய்யாமல் தூய்மையான மனத்துடன் அவரது விருந்தில் பங்கேற்போம். “அழைப்புப் பெற்றவர்கள் பலர்; ஆனால், தேர்ந்தெடுக்கப்பட்டவர்களோ சிலர்” என்ற ஆண்டவரின் வார்த்தையில், தேர்ந்தெடுக்கப்பட்ட சிலரில் நாமும் ஒருவராக வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

ஆண்டவர் தம் மக்களுக்கு ஆயத்தப்படுத்தும் விருந்தையும், எல்லா மக்கள்மீதும் பொழியும் அவரது இரக்கத்தையும், நம்மீது அவர் கொண்டுள்ள உண்மையான அன்பையும் பற்றி இறைவாக்கினர் எசாயா எடுத்துரைக்கிறார். நம் மரணத்தை அழித்து, கண்ணீரைத் துடைத்து, நமக்கு மீட்பையும் மகிழ்ச்சியையும் வழங்கும் இறைவனில் நம்பிக்கை கொண்டு வாழ அழைக்கும் முதல் வாசகத்திற்குச் செவிமடுப்போம். 

இரண்டாம் வாசகம் முன்னுரை

வாழ்வில் ஏற்படுகின்ற இன்பங்கள், துன்பங்கள், தோல்விகள், வெற்றிகள், நிறைகள், குறைகள், வளமை, வறுமை என அனைத்திலும் இறைவனைச் சார்ந்து வாழும்போது எதையும் நம்மால் எதிர்கொள்ள முடியும். நமது வழியாகவும் ஒளியாகவும் இருக்கும் இயேசுவின்மீது நம்பிக்கையுடன், அனைத்திலும் இறைத்திருவுளம் அறிந்து செயல்பட அழைக்கும் இரண்டாம் வாசகத்திற்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! எம் திரு அவைத் தலைவர்கள் தமது பணியில் உண்மையுடனும் தியாக உள்ளத்துடனும் செயல்பட்டு, பலரை இறைவனிடம் அழைத்துச் செல்லும் கருவிகளாகத் திகழ்ந்திட தேவையான ஞானத்தைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. இரக்கத்தின் ஆண்டவரே! உலகக் கவலைகளாலும், பல்வேறு தடைகளாலும் உம்மிடமிருந்து விலகி இருக்கும் மக்கள் அனைவரும் உமது அன்பையும், பேரிரக்கத்தையும் உணர்ந்து மீண்டும் உம்மிடம் திரும்பிவர திட மனத்தைத் தந்து காத்திட வேண்டுமென்று இறைவா உம்மை மன்றாடுகின்றோம்.

3. பாசமுள்ள ஆண்டவரே! எம் குடும்பங்கள் இறைவிருந்தில் ஒன்றிணைந்து பங்கேற்கும் குடும்பங்களாகவும், அன்பு, நம்பிக்கை, மன்னிப்பு, பகிர்வு ஆகியவற்றை வளர்க்கின்ற குடும்பங்களாக விளங்கிடவும் வரம்தர வேண்டுமென்று இறைவா உம்மை மன்றாடுகின்றோம்.

4. கருணையின் இறைவா! திருமண விருந்திற்கு அழைக்கப்பட்டவர்களைப்போல நாங்களும் இறையழைப்பை ஏற்று, நற்செய்தி கூறும் விழுமியங்களைக் கடைப்பிடித்து வாழ வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

“என் அருள் உனக்குப் போதும்” என்று மொழிந்த இறைவனின் அருள்வரங்களைப் பெற, ஆவலோடு வந்துள்ள உங்கள் அனைவரையும் அன்போடு இந்த ஞாயிறு திருப்பலிக்கு வரவேற்கிறோம். இன்றைய நற்செய்தியில் திராட்சைத் தோட்டத்தின் உரிமையாளர் தன் தோட்டத்தைப் பராமரிக்கும் பணியைப் பொறுப்பான வேலைக்காரரிடம் ஒப்படைக்கிறார். ஆனால், அவர்களோ நன்றிகெட்டவர்களாகவும், பேராசை கொண்டவர்களாகவும் செயல்பட்டு, அனுப்பப்பட்ட பணியாளர்களையும் இறுதியாக உரிமையாளரின் ஒரே மகனையும் கொன்றுவிட்டார்கள். இதற்குக் காரணம் பொறாமை என்ற அரக்கன்.

“பொறாமை கொண்டவன் ஒருபோதும் மன அமைதியையோ, ஆன்மிக விழிப்புணர்வையோ அடைய முடியாது” என்கிறார் புத்தர். திராட்சைத் தோட்டம் என்பது கடவுள் நமக்குக் கொடுத்துள்ள ஆன்மிகக் கொடைகள் மற்றும் கடமைகளைக் குறிக்கிறது. நாம் அனைவரும் அதற்குப் பொறுப்பான தோட்டக்காரர்கள். தகுந்த காலத்தில் நாம் கடவுளுக்கு நற்செயல்களாகிய கனிகளைக் கொடுக்க வேண்டும். நற்செயல்களாலேயே இறைவனின் அழைப்பிற்கு நாம் தகுதியுள்ளவராகிறோம். நாம் அனைவருமே இந்த உலகிற்கு வந்துள்ள விருந்தினர்கள். எனவே, எதன்மீதும் பேராசை கொள்ளாமல்  வாழ்க்கை என்ற தோட்டத்தில் அன்பு, இரக்கம், பொருமை, விட்டுக்கொடுத்தல், மன்னிப்பு, நீதி, நேர்மை, அமைதி என்ற மதிப்புமிக்கக் கனிகளை இந்த உலகிற்கும் உறவுகளுக்கும் கொடுத்து வாழ்வோம். புனித பிரான்சிஸ் அசிசியார் கூறுவது போன்று, பகையுள்ள இடத்தில் பாசத்தையும், அவநம்பிக்கையுள்ள இடத்தில் நம்பிக்கையையும், இருள் சூழ்ந்த இடத்தில் ஒளியையும், துயரம் நிறைந்த உள்ளத்திற்கு மகிழ்ச்சியையும் கொடுத்து, அனைத்திலும் இறைவனைக் கண்டு மகிழ்வோடு வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகம், கடவுளுக்கும் இஸ்ரயேலருக்கும் இடையேயான உறவை ஒரு திராட்சைத் தோட்ட உவமையின் வழியாக அழகாக எடுத்துரைக்கிறது. இஸ்ரயேல் மக்களைக் கடவுள் கண்மணிபோல் பாதுகாத்தார். அளவற்ற அன்புகாட்டி பாதுகாத்த இறைனுக்கு, இஸ்ரயேல் மக்கள் நம்பிக்கைத் துரோகம் செய்தார்கள். அன்றாடம் கடவுளின் அன்பைச் சுவைக்கும் நாம், நற்கனிகளைக் கொடுத்து வாழ அழைக்கும் இறைவார்த்தைக்குச் செவிகொடுப்போம்.

இரண்டாம் வாசகம் முன்னுரை

வாழ்க்கையில் கவலைகளும், நாளைய பற்றிய பயங்களும் நம்மை ஆட்கொள்ளும்போது கலங்காமல் நன்றியுணர்வோடு இறைவனிடம் செபிக்குமாறு பவுல் நமக்கு அழைப்பு விடுக்கிறார். உண்மை, நீதி, தூய்மை, கண்ணியம்,  நேர்மை போன்ற மதிப்பீடுகளை ஒவ்வொரு நாளும் நாடித் தேடிடவும், இறைநம்பிக்கையில் வேரூன்றிடவும் அழைக்கும் இரண்டாம் வாசகத்திற்குச் செவிமடுப்போம்.

இறைநம்பிக்கையாளர் மன்றாட்டுகள்

1. ஞானத்தின் ஊற்றே எம் இறைவா! உமது திராட்சைத் தோட்டமாகிய திரு அவையை வழிநடத்த நீர் தேர்ந்துகொண்ட திருத்தந்தை, ஆயர்கள், அருள்பணியாளர்கள் மற்றும் துறவியர் அனைவரும் நற்பொறுப்பாளர்களாகச் செயல்பட வரம்தர வேண்டுமென்று இறைவா உம்மை மன்றாடுகின்றோம்.

2. நீதியின் இறைவா! உலக நாடுகளை ஆளும் தலைவர்கள் தங்களுக்குக் கொடுக்கப்பட்டுள்ள அதிகாரத்தைச் சுயநலத்திற்குப் பயன்படுத்தாமல், ஏழை எளிய மக்களின் நலனிற்காகவும், நாட்டின் வளர்ச்சிக்காகவும் பயன்படுத்தத் தேவையான ஞானத்தைத் தலைவர்களுக்குத் தந்து காத்திட வேண்டுமென்று இறைவா உம்மை மன்றாடுகின்றோம்.

3. அன்பின் இறைவா! புனித பிரான்சிஸ்கு அசிசியாரின் விழாவைக் கொண்டாடும் இந்நாளில் அப்புனிதரைப் போன்று இயற்கையிலும், ஏழை மக்களிலும் உமது முகத்தைக் காணவும், ஆண்டவரைச் சுவைப்பதில் அலாதி இன்பம் கொண்டு வாழவும் வரம்தர வேண்டுமென்று இறைவா உம்மை மன்றாடுகின்றோம்.

4. வழிகாட்டும் நாயகனே எம் இறைவா! எம் இளையோர் இணையதளத்தில் தங்கள் வாழ்க்கையைத் தொலைத்துவிடாமல், தகவல்தொடர்பு சாதனங்களை நல்ல முறையில் பயன்படுத்திடவும், கடவுளை அறிவதில் ஆர்வம் கொண்டு வாழவும் வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

மனமாற்றம் பெற்று புதுவாழ்வு வாழ ஆண்டின் பொதுக்காலம் 26-ஆம் ஞாயிறு நமக்கு அழைப்பு விடுக்கிறது. இன்றைய நற்செய்தியில் கூறப்பட்டுள்ள தோட்டத்திற்கு வேலை செய்ய அனுப்பப்படும் இரு மகன்களின் உவமையில் ‘போகமாட்டேன்’ என்று முதலில் மறுத்து, பின்னர் மனம்மாறிச் சென்று வேலை செய்த முதல் மகனைப்போல, நாமும் பல நேரங்களில் கடவுளின் வார்த்தைக்குக் கீழ்ப்படியத் தவறியிருக்கலாம்; ஆனால், நமது பாவங்களையும் தவறுகளையும் உணர்ந்து, உண்மையான மனமாற்றத்தோடு அவரிடம் திரும்பி வரும்போது கடவுள் நம்மை அன்போடு அரவணைத்துக்கொள்வார்.

வெறும் வார்த்தைகளால் அல்லாமல், வாழ்வால் இறைவனின் திருவுளத்தை நிறைவேற்றுவதே சீடத்துவம். ‘போகிறேன்’ என்று சொல்லிவிட்டுப் போகாத இரண்டாம் மகனைப்போல, நமது நம்பிக்கை வெறும் உதட்டளவிலான பேச்சாக மட்டும் நின்றுவிடக் கூடாது; நாம் செய்யும் ஒவ்வொரு செயலிலும் இறைவனின் விருப்பத்தைப் பிரதிபலிக்கவேண்டும். திருமண நாளிலும், துறவற அர்ப்பண நாளிலும் ஆண்டவர்முன் வார்த்தைப்பாடுகளைக் கொடுக்கின்றோம். கொடுத்த வார்த்தைப்பாடுகளைப் பின்பற்றுகிறோமா? குறையில்லாத மனிதர் இல்லை; எனவே, குறைகளைக் குறைத்து, உண்மையான மனமாற்றம் அடைந்து  இயேசுவின் உண்மையான சீடர்களாய் வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகத்தில், எசேக்கியேல் இறைவாக்கினர்  இறைவனின் நீதி மனிதரின் கணிப்பைக் காட்டிலும் எவ்வளவு மேலானது என்பதை நமக்கு எடுத்துக்காட்டுகின்றார். ஒரு பாவி தான் செய்துவந்த தீமையிலிருந்து விலகி மனம்மாறி, நேர்மையோடும் நீதியோடும் வாழ்ந்தால் அவர் நிச்சயம் வாழ்வார் என்று கூறி, மனமாற்றம் பெற்று நல்மனிதர்களாக வாழ அழைக்கும் இவ்வாசகத்திற்குச் செவிமடுப்போம்.

இரண்டாம் வாசகம் முன்னுரை

வீண்பெருமைக்கும் பகட்டான வாழ்விற்கும் சுயநலத்திற்கும் முக்கியத்துவம் கொடுக்காமல், மனத்தாழ்மை உள்ளவர்களாய் வாழவும், மற்றவர்களைப் பற்றிய நமது எண்ணங்கள் உயர்வானதாக இருக்கவும், இயேசுவைப் போன்று தாழ்ச்சியுள்ளவர்களாய் வாழவும், பிறருக்கு உதவி செய்வதில் கருத்தாய் இருக்கவும் அழைக்கும் இரண்டாம் வாசகத்திற்குச் செவிமடுப்போம். 

நம்பிக்கையாளர் மன்றாட்டுகள்

1. அன்பின் இறைவா எம் திரு அவையை வழிநடத்தும் திருத்தந்தை, ஆயர்கள், அருள்பணியாளர்கள், துறவியர் அனைவரும் இயேசுவின் மனநிலையைக் கொண்டு வாழவும், சொற்களைவிட செயலுக்கு முக்கியத்துவம் கொடுத்துச் சிறப்பாகப் பணி செய்யவும் தேவையான அருள்வரங்களைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. இரக்கமுள்ள இறைவா! ‘போகிறேன்’ என்று கூறிவிட்டு வேலைக்குச் செல்லாத இரண்டாவது மகனைப்போல, உதட்டளவில் பேசும் வாய்ச்சொல் வீரர்களாக இல்லாமல், எங்களது பாவநிலையை உணர்ந்து, உமது திருவுளத்திற்குக் கீழ்ப்படிந்து வாழ்ந்திட வரம்தர வேண்டுமென்று இறைவா உம்மை மன்றாடுகின்றோம்.

3. அன்பின் இறைவா! உமது பிள்ளைகளாகிய நாங்கள் அனைவரும் எங்களைப் பற்றி பெருமை பாராட்டுவதில் முனைப்பாக இல்லாமல், மற்றவர்களைப் பற்றி உயர்வான எண்ணம் கொண்டவர்களாக, கிறிஸ்துவைப் போன்று தாழ்ச்சியும் தூய்மையான இதயமும் கொண்டு  வாழ வரம்தர வேண்டுமென்று இறைவா உம்மை மன்றாடுகின்றோம்.

4. இரக்கத்தின் இறைவா! எம் நாட்டிலும், எமது குடும்பங்களிலும் பல்வேறு கொடிய நோயினால் பாதிக்கப்பட்டுத்  துன்பப்படும் எம் சகோதர- சகோதரிகளுக்கு நிறைவான சுகத்தையும், அந்த நோயினின்று விடுதலையையும், மனவலிமையையும் தந்து காத்திட வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

இறைவனின் அளவற்ற இரக்கத்தையும், தாராள உள்ளத்தையும் பற்றி சிந்திக்க ஆண்டின் பொதுக்காலம் 25-ஆம் ஞாயிறு நமக்கு அழைப்பு விடுக்கிறது. இன்றைய நற்செய்தியில் திராட்சைத் தோட்ட உரிமையாளர் அதிகாலையில் வேலைக்கு வந்தவர்களுக்கும், மாலையில் ஒரு மணிநேரம் மட்டுமே வேலை செய்தவருக்கும் சமமாக ஒரு தெனாரியம் கொடுக்கிறார். மனிதநீதி, வேலையின் அளவிற்கு ஏற்ப கூலி என்று கணக்கிடுகிறது. ஆனால், இறைவனின் நீதியோ ஒவ்வொருவரின் தேவையை நிறைவு செய்யும் அளவற்ற அன்பு கொண்டது. இறைவனின் இரக்கம் அனைத்து உயிர்களையும் தாங்கி நிற்கும் பேரன்பின் வடிவம்; இவ்வுலகத்தை இயக்கும் பேராற்றல். எனவே, மற்றவர்களோடு நம்மை ஒப்பிட்டுப் பார்த்துப் பொறாமைப்படாமல், மற்றவர்களின் வளர்ச்சியை விமர்சிக்காமல்  இறைவனின்  தாராளக் கொடையை நன்றியோடு நினைப்போம். நாம் எப்போதும் இறைவனின் இரக்கத்தின் நிழலில் வாழ்கிறோம் என்பதை மனத்தில் இருத்துவோம். பிறருக்குக் கிடைக்கும் ஆசிகளையும், இறைவனின் இரக்கத்தையும் கண்டு மகிழமுடியாத இதயமே ஆன்மிக வறுமையின் அடையாளம். பிறரின் ஆசிகளையும் வளர்ச்சியையும் கண்டு மகிழும் தாராள உள்ளத்தை நமக்குத்தர மன்றாடுவோம். பிறரோடு ஒப்பிட்டுப் பார்க்கும் குணத்தைத் தவிர்த்து, இறைவனின் இரக்கம் எப்போதும் நம்முடன் இருப்பதற்காய் நன்றி கூறுவோம். அளவிடமுடியாத பெருங்கடல் போன்ற கடவுளின் இரக்கத்தால்  வாழும் நாம் இந்த உலகம் என்னும் இறைவனின் திராட்சைத் தோட்டத்தில் மகிழ்வோடு பணிசெய்து, பன்மடங்கு பலன் கொடுக்க வரம் வேண்டி இணைவோம் இத்திருப்பலியில்.

முதல் வாசகம் முன்னுரை

ஆண்டவரைக் கண்டுகொள்ளக்கூடிய வாய்ப்புள்ள காலத்திலேயே அவரைத் தேடவும், அவர் அருகில் இருக்கும்போதே அவரை நோக்கிக் கூப்பிடவும் இறைவாக்கினர் எசாயா நமக்கு அழைப்புவிடுக்கிறார். நமது தீய சிந்தனைகளையும் செயல்களையும் விட்டுவிலகி, ஆண்டவரிடம் திரும்பி வரும்போது நம்மை மன்னிக்கக்  காத்துக் கொண்டிருக்கிறார் என்ற நம்பிக்கைச் செய்தியைக் கொடுக்கும் முதல் வாசகத்திற்குச் செவிமடுப்போம்.

இரண்டாம் வாசகம் முன்னுரை

‘வாழ்வது கிறிஸ்து; சாவது ஆதாயம்’ என்ற உறுதியான நம்பிக்கையோடு, தான் வாழ்ந்தாலும் இறந்தாலும் கிறிஸ்துவின் மாட்சி விளங்குவதே தனது ஒரே விருப்பம் என்கிறார் பவுலடியார். கிறிஸ்துவோடு இணைந்து வாழும்போது உறவுகள் வளரும், மகிழ்ச்சி பெருகும், துன்பங்கள் குறையும். எனவே, நாம் ஒருவர் மற்றவருக்கு நம்பிக்கையின் தூதுவராக வாழவும், நல்மதிப்பீடுகளை வாழ்க்கையால் விதைக்கவும் அழைக்கும் இரண்டாம் வாசகத்திற்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! எம் திரு அவைத் தலைவர்கள் கிறிஸ்துவை மட்டுமே தங்கள் வாழ்வின் மையமாகக் கொண்டு வாழவும், தங்களிடம் ஒப்படைக்கப்பட்ட மக்களிடம் இரக்கத்தோடும் அன்போடும் இருக்கவும், தங்களை அழைத்த ஆண்டவர் கைவிடமாட்டார் என்ற நம்பிக்கையில் தொடர்ந்து தொய்வின்றிப் பயணிக்கவும் வரம்தர வேண்டுமென்று இறைவா உம்மை மன்றாடுகின்றோம்.

2. பாசமுள்ள ஆண்டவரே! உமது பிள்ளைகளாகிய நாங்கள் அனைவரும் தீய வழிகளை விட்டுவிலகி உமது மதிப்பீடுகளின் வழியில் வாழவும், மற்றவர்களின் வளர்ச்சியில் மகிழ்ந்திருக்கவும், உடன் வாழும் சகோதர, சகோதரிகளோடு அமைதியோடு வாழவும் வரம்தர வேண்டுமென்று இறைவா உம்மை மன்றாடுகின்றோம்.

3. இரக்கத்தின் ஆண்டவரே, எம் பங்கில் உள்ள குடும்பங்களில் அன்பு, மன்னிப்பு, பகிர்வு, விட்டுக்கொடுத்தல் போன்ற மதிப்பீடுகள் வளரவும், தீராத நோய்கள் விலகிடவும், அருள்செல்வம், பொருள்செல்வம் பெருகிடவும் வரம்தர வேண்டுமென்று இறைவா உம்மை மன்றாடுகின்றோம்.

4. வல்லமையின் ஆண்டவரே! எம் பங்கிலுள்ள குழந்தைகள் படிப்பிலும் பக்தியிலும் வளர்ந்திடவும், திருப்பலி, மறைக்கல்வி, பீடச்சிறுவர்கள் பணி  போன்றவற்றிற்கு முக்கியத்துவம் கொடுக்கவும், கடவுளைப் பற்றிய அறிவில் வளரவும் வரம்தர வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

அறிவியல் உலகில் மெய்ஞானமாகிய இறைவனைத் தேடி, ஞாயிறு திருப்பலிக்கு வருகை புரிந்திருக்கும் உங்கள் அனைவரையும் அன்போடு வரவேற்கின்றோம். இன்றைய நற்செய்தியானது அளவின்றி மன்னிக்கவும், நல்லுறவுடன் வாழவும் நமக்கு அழைப்புவிடுக்கிறது. பகை எப்போதுமே நமக்குப் பாதிப்பைத்தான் ஏற்படுத்துகிறது. இரக்கமற்ற பணியாளனின் உவமை, இறைவன் நம்மீது கொண்டுள்ள பேரிரக்கத்தையும் பேரன்பையும் எடுத்துரைக்கின்றது. ஆயிரம் தவறுகள் செய்து, தேடிவரும்போதெல்லாம் அணைக்கின்ற இறைவனின் இரக்கத்திற்காக நன்றி கூறுவோம். நம்மிடம் உள்ள பகை, வன்மம், கசப்புணர்வு, மன்னிக்க முடியாத மனநிலை அனைத்தையும் ஆண்டவரிடம் ஒப்படைத்து விடுவோம். கடவுள் நம்மை நிபந்தனையில்லாமல் மன்னித்து ஏற்றுக்கொள்வதுபோல, நாமும் உடன் வாழும் சகோதர-சகோதரிகள் நமக்கு எதிராகச் செய்யும் குற்றங்களை நிபந்தனையின்றி மன்னிப்போம்.

மன்னிப்பு என்பது பிறருக்கு நாம் செய்யும் தயவு அல்ல; மாறாக, நம் மனத்தை கோபம், கசப்பு என்ற சிறைகளிலிருந்து விடுவிக்கும் திறவுகோல். மன்னிக்கும் மனம் இறைவனின் அமைதியைச் சுவைக்கிறது. மன்னிப்பு கடந்த காலத்தை மாற்றாது; ஆனால், அது எதிர்காலத்தை வெளிச்சமாக மாற்றும். மன்னிப்பு என்பது ஒரு தற்காலிகச் செயலல்ல; அது நாம் நாள்தோறும் வாழவேண்டிய கிறித்தவ வாழ்க்கை முறை. எனவே, மன்னிப்பை அனைவருக்கும் கொடுத்து, மகிழ்வோடு வாழ வரம்வேண்டி இணைவோம் இத்திருப்பலியில். 

முதல் வாசகம் முன்னுரை

இன்றைய முதல் வாசகம் மன்னிப்பின் அவசியத்தைப் பற்றித் தெளிவாகக் கூறுகிறது. கோபமும் சினமும் வெறுக்கத்தக்கவை என்றும், அவற்றைப் பிடித்து வைத்திருப்பவர் ஆண்டவரிடமிருந்து தண்டனையைப் பெறுவார் என்றும் எச்சரிக்கிறது. பல ஆண்டுகள்  பகையோடு வாழும் உறவுகளை மன்னித்து, ஆண்டவரின் அருளைப் பெற்று வளமோடு வாழ அழைக்கும் இவ்வாசகத்திற்குச் செவிமடுப்போம்.

இரண்டாம் வாசகம் முன்னுரை

வாழ்க்கையில் நாம் சந்திக்கின்ற அனைத்திலும் ஆண்டவரின் திருவுளத்தை நாட வேண்டும். நமது செயல்கள் அனைத்தும் நமது  பெயருக்காக, புகழுக்காக அல்ல; மாறாக, ஆண்டவரின் விருப்பதிற்கு உகந்ததாக இருக்க வேண்டும். நமது சுயநலத்தை விடுத்து, ஒவ்வொரு நிமிடத்தையும் இறையாட்சிப் பணிக்காகப் பயன்படுத்தி, கடவுளின் அன்பில் நிலைத்திருக்க அழைக்கும் இரண்டாம் வாசகத்திற்குச் செவிமடுப்போம்.

நம்பிக்கையாளர் மன்றாட்டுகள்

1. அன்பின் இறைவா! எம் திரு அவைத் தலைவர்கள் இறைவனின் எல்லையற்ற இரக்கத்தையும், அளவற்ற மன்னிப்பையும் தங்கள் வாழ்க்கையால் போதிக்கவும், மக்களை நற்செய்தியின் ஒளியில் கட்டியெழுப்பவும் தேவையான அருள்வரங்களைத் தந்து காத்திட வேண்டுமென்று இறைவா உம்மை மன்றாடுகின்றோம்.

2. எழுபதுமுறை மன்னிக்கவேண்டுமென்று மொழிந்த எம் இறைவா! மன்னிக்காத உள்ளத்தோடு உம்மை உட்கொண்ட நேரங்களுக்காக மன்னிப்பு வேண்டுகின்றோம். எங்கள் உள்ளங்களில் உள்ள கோபம், வெறுப்பு, பழிவாங்கும் குணம் அனைத்தையும் விடுத்து, மனப்பூர்வமாக மன்னித்து அமைதியோடு வாழ வரம்தர வேண்டுமென்று உம்மை மன்றாடுகின்றோம்.

3. கடவுளுக்கு உகந்தவர்களாய் வாழ அழைப்பு விடுக்கும் இறைவா! எங்களது பேராசையாலும், பாவ வாழ்க்கையாலும் உம்மிடமிருந்து விலகி இந்த உலகப்போக்கின்படி வாழாமல், உமது திருவுளத்தை நிறைவேற்றுவதில் முனைப்புடன் செயல்பட வரம் தரவேண்டுமென்று இறைவா உம்மை மன்றாடு கின்றோம்.

4. தேடிவரும் போதெல்லாம் அரவணைக்கும் இறைவா! எங்கள் குடும்பங்களில் உண்மையான அன்பும், விட்டுக் கொடுக்கும் மனப்பக்குவமும் வளர்ந்திடவும், நிறை-குறையோடு அனைவரையும் அன்புசெய்து வாழவும் தேவையான மனப்பக்குவத்தை எங்கள் அனைவருக்கும் தந்து காத்திட வேண்டுமென்று இறைவா உம்மை மன்றாடுகின்றோம்.

திருப்பலி முன்னுரை

சகோதரத்துவத்தில் நிலைத்திருக்கவும், கூடி செபிக்கவும் ஆண்டின் பொதுக்காலம் 23-ஆம் ஞாயிறு நமக்கு அழைப்புவிடுக்கிறது. இன்றைய நற்செய்தியில் இயேசு கிறிஸ்து, கிறித்தவச் சமூகத்தில் நிலவவேண்டிய அன்பு, மன்னிப்பு, சகோதரத்துவம் போன்ற மதிப்பீடுகளின் முக்கியத்துவத்தைப் பற்றியும், கூட்டுச் செபத்தின் வல்லமையைப் பற்றியும் கூறுகின்றார். மற்றவர்களைக் காயப்படுத்துவதையோ, பழிவாங்குவதையோ, ஏளனமாகப் பேசுவதையோ தவிர்த்து, தவறுகளை அன்போடும் கரிசனையோடும் சுட்டிக்காட்டி, சகோதர உறவில் நிலைத்து வாழ இயேசு அறிவுறுத்துகிறார். பிணக்குகள் இன்றி இணக்கத்தோடு வாழும்போது, கடவுள் நம் மத்தியில் இருப்பார். அவரது வல்லமை நம்மில் செயல்படும் என்பதையும் நற்செய்தி எடுத்துரைக்கிறது. “உங்கள் சகோதர சகோதரிகளுள்...” என்று இயேசு தொடங்கும்போதே, நாம் மனத்தாங்கல் கொள்ளும் எவரும் நமது அந்நியர் அல்லர்; மாறாக, நாம் அன்பு செய்யவேண்டிய சகோதர-சகோதரிகள் என்ற உண்மையை இயேசு விளக்குகிறார்.

நம் சமூகத்தில் வாழும் அனைத்து மனிதர்களுடனும் நல்லுறவுடன் வாழ்வோம். மற்றவர்களோடு நாம் கொண்டுள்ள அன்பும் அமைதியும் நட்புறவுமே நமது ஆன்மிக வாழ்க்கையின் அடிப்படையாக உள்ளது. உண்மை ஆன்மிகம் என்பது சகோதரத்துவத்தில்தான் செழித்து வளர்கிறது. எனவே, பகையை விடுத்து, அனைத்து மக்களையும் உடன்பிறப்புகளாக ஏற்று வாழ்வோம். உடன்வாழும் சகோதர-சகோதரிகளை நிறை-குறையோடு ஏற்று, அன்பைப் பகிர்ந்து, உறவில் மகிழ்ந்து வளமோடு வாழ வரம் வேண்டி இணைவோம் இத்திருப்பலியில்.

முதல் வாசகம் முன்னுரை

இன்றைய முதல் வாசகத்தில் இறைவன், இறைவாக்கினர் எசேக்கியேலைத் தம் மக்களின் ‘காவலராக’ நியமிக்கிறார். தவறு செய்கிற ஒருவரை எச்சரித்து, நல்வழிப்படுத்த வேண்டிய ஆன்மிகப் பொறுப்பு நம் ஒவ்வொருவருக்கும் உண்டு என்பதை இப்பகுதி சுட்டிக்காட்டுகிறது. தீயோரை அவர்களின் தீய வழியிலிருந்து எச்சரிக்கத் தவறினால் அவர்களின் அழிவுக்கு நாமும் பொறுப்பாளியாவோம் எனக் கூறி பிறரின் ஆன்மிக நலனில் அக்கறை கொண்டு வாழ அழைக்கும் இறைவார்த்தைக்குச் செவிமடுப்போம்.

இரண்டாம் வாசகம் முன்னுரை

இன்றைய இரண்டாம் வாசகத்தில் திருத்தூதர் பவுல் கிறித்தவ வாழ்வின் மையமான ‘அன்பை’ அனைவரும் செய்யவேண்டிய ஒரே கடனாக முன்வைக்கிறார். அன்பு என்னும் ஒரே கடனைத் தவிர, வேறு எந்தக் கடனும் நம்மிடம் இருக்கக் கூடாது என்ற அழைப்பினை ஏற்று, வாழ்வின் எல்லாச் சூழ்நிலைகளிலும் அன்பை அனைவருக்கும் வழங்கி, அன்பின் சீடர்களாக வாழ அழைக்கும் இறைவார்த்தைக்குச் செவிமடுப்போம்.

நம்பிக்கையாளர் மன்றாட்டுகள்

1. ‘நானே நல்ல ஆயன்’ என்று மொழிந்ந ஆண்டவரே! எம் திரு அவையை வழிநடத்தும் திருத்தந்தை, ஆயர்கள், அருள்பணியாளர்கள், அருள்சகோதரிகள் அனைவரும் சகோதரத்துவத்தையும் அன்பையும் மன்னிப்பையும் இம்மண்ணில் கட்டியெழுப்பவும், மக்களின் குறிப்பறிந்து செயல்படும் நல்ல மேய்ப்பர்களாக வாழவும் வரம்தர வேண்டுமென்று இறைவா உம்மை மன்றாடுகின்றோம்.

2. வழிகாட்டும் நாயகனே இறைவா! எங்கள் நாட்டுத் தலைவர்கள் சுயநலமின்றி மக்களின் நலனில் அக்கறைகொண்டு வாழவும், ஏழை மக்களின் வாழ்வாதாரத்தை உயர்த்தும் நீதியான சட்டங்களை இயற்றவும், நாட்டின் அமைதிக்காக உழைக்கவும் தேவையான ஞானத்தைத் தந்திட வேண்டுமென்று இறைவா உம்மை மன்றாடுகின்றோம்.

3. அன்பின் ஆண்டவரே! உமது பிள்ளைகளாகிய நாங்கள் அனைவரும் கசப்புணர்வுகள் நீங்கி, ஒருவரையொருவர் ஏற்று நல்லுறவுடன் வாழவும், மற்றவர்கள் செய்யும் தவறுகளை மென்மையான வார்த்தைகளால் சுட்டிக்காட்டவும், அனைவரையும் சகோதர-சகோதரிகளாக ஏற்று அன்பு செய்து வாழவும் வரம்தர வேண்டுமென்று இறைவா உம்மை மன்றாடுகின்றோம்.

4. ‘கைவிட மாட்டேன்’ என்று கூறிய ஆண்டவரே! மனக்கவலையினாலும் தீராத நோயினாலும் புரிந்துகொள்ளாமையாலும் துன்பப்படும் எம் சகோதர-சகோதரிகளுக்கு உடல் ஆரோக்கியத்தையும் மனபலத்தையும் தந்து காத்திட வேண்டுமென்று இறைவா உம்மை மன்றாடுகின்றோம்.