தமிழக செய்திகள்

‘நம் வாழ்வின்’ பொன்விழா ஆண்டில் ‘நம் வாழ்வு’ இதழின் தனித்துவம், முக்கியத்துவம், இதழின் சிரமங்கள் ஆகியவற்றை மக்களுக்கு எடுத்துக்கூறி, பல மக்களை ‘நம் வாழ்வு’ சந்தாதாரராக மாற்றியுள்ளார் சென்னை-மயிலை உயர்மறைமாவட்டத்தின் வண்ணாரப்பேட்டை பங்கின் பங்குத்தந்தை அருள்பணி. அருள் ஜேசுதாஸ் அவர்கள்.  குறிப்பாக, குழந்தைகளை வாசிக்க ஊக்குவிக்கும் பொருட்டு, 65 மாணவர்களுக்கு, ‘கல்விச் சுரங்கம்’ எனும் மாணவர் மாத இதழை அறிமுகப்படுத்தியுள்ளார். மேலும், அண்மையில் வெளியிட்ட ‘வானவில் வரிசை நூல்கள்’ (மாணவர்களின் பன்முக ஆளுமை வளர்ச்சிக்கான 7 நூல்கள்) 65 மாணவர்கள் வாங்கிப் பயன்பெற ஊக்கப்படுத்தியுள்ளார்.

இந்த அரிய முயற்சியை மேற்கொண்ட அருள்தந்தை அருள் ஜேசுதாஸ் அவர்களுக்கும், அனைத்து மறைக்கல்வி மாணவர்கள்-ஆசிரியர்களுக்கும் சிறப்பான நன்றி!             

- முதன்மை ஆசிரியர்

திருச்சி மாவட்டம், சமயபுரம் - பள்ளிவிடை புனித உயர்நிலைப் பள்ளியின் தலைமையாசிரியர் அருள்முனைவர் சாந்தகுமார். கடந்த செப்டம்பர் 5 அன்று, கல்வி அமைச்சர் மாண்புமிகு திரு. அன்பில் மகேஷ் பொய்யாமொழி அவர்களது முன்னிலையில் துணை முதலமைச்சர் மாண்புமிகு. உதயநிதி ஸ்டாலின் அவர்களால் டாக்டர். இராதாகிருஷ்ணன் விருது பெற்றுப் பள்ளிக்குப் பெருமை சேர்த்துள்ளார். கடந்த 15 ஆண்டுகளாகக் கல்விப் பணியில் சிறப்பாகப் பணியாற்றி வரும் இவர், பல்வேறு கல்வி நிறுவனங்களில் தலைமையாசிரியராகப் பணியாற்றியவர். தற்போது புனித மரியன்னை உயர்நிலைப் பள்ளியில் தலைமையாசிரியராகப் பொறுப்பேற்ற அருள்தந்தை அனைத்துச் செயல்களிலும் சிறப்பாகச் செயல்பட்டு ஓர் எடுத்துக்காட்டான ஆசிரியராகத் திகழ்கின்றார். மாணவர் சேர்க்கை, மாணவர் தேர்ச்சி, பசுமை வளாகம், சிறுவர் பூங்கா, கணினி அறைகள், இசைக்கருவிகளுடன் கூடிய கலைக்கூடம், மழைநீர் தேங்காத வண்ணம் சாலைகள், எழில்மிகு வண்ணங்களில் பள்ளிக் கட்டடங்கள், பேண்ட் வாத்திய இசைக் குழு, ஏ.பி.ஜே. அப்துல் கலாம் இலவச மாலைப் பள்ளி, விளையாட்டு அரங்கம், விளையாட்டு மைதானம், ஆங்கில இலக்கண வகுப்புகள், இலவச விளையாட்டுச் சீருடை, இலவசப் புத்தகப் பைகள் என மாணவர்களின் தேவைகளை நிறைவுசெய்து வருகிறார். மாணவர்களின் வளர்ச்சிக்காகவும் பள்ளியின் முன்னேற்றத்திற்காகவும் இவர் மேற்கொண்ட முயற்சிகளும் உழைப்பும் எண்ணிலடங்காதவை. இவரது அர்ப்பணிப்புக்குக் கிடைத்த மிகப்பெரிய அங்கீகாரமே ‘நல்லாசிரியர் விருது’. தந்தை அவர்கள் தொடர்ந்து கல்விப் பணியில் பல சாதனைகள் படைக்க ‘நம் வாழ்வு’ அன்போடு வாழ்த்துகிறது.                                    

- முதன்மை ஆசிரியர்

சென்னை-நசரேத்பேட்டையில், 16-வது பொது அவையின் இறுதி ஆவணத்தின் தமிழாக்கம், தமிழ்நாடு ஆயர் பேரவையின் தலைவர் பேராயர் மேதகு ஜார்ஜ் அந்தோணிசாமி அவர்களால் வெளியிடப்பட்டது. பேராயர் அவர்களின் 20-ஆம்  ஆண்டு ஆயர் திருநிலைப்பாட்டு நிகழ்வில் இந்நூல் வெளியீட்டு விழா மிகச் சிறப்பாக நடைபெற்றது.  கத்தோலிக்கத் திரு அவை காலத்தின் அறிகுறிகளைக் கணித்து, தன்னைத்தானே புதுப்பிக்கும் பணியில் கூட்டொருங்கியக்கத் திரு அவையாகத் தன்னை அடையாளப்படுத்துவதற்காக, கருத்துச் செறிவுமிக்க கலந்துரையாடல்கள் மற்றும் கருத்தமர்வுகளை உள்ளடக்கிய உலகளாவிய 16-வது ஆயர் மாமன்றமானது, 2023 அக்டோபர் மற்றும் 2024 அக்டோபர் ஆகிய இரண்டு வெவ்வேறு தருணங்களில் திருத்தந்தை பிரான்சிஸ் அவர்கள் தலைமையில் நடைபெற்ற ஆயர் மாமன்றத்தின் சிந்தனைகளை அனைவரிடமும் கொண்டுபோய் சேர்ப்பதற்காக, தமிழ்நாடு ஆயர் பேரவையின் ஒப்புதலில் மொழியாக்கம் செய்யப்பட்டது. இக்கருத்துச் செறிவுமிக்க ஆவணத்தை, கோவை-நல்லாயன் குருத்துவக் கல்லூரி பேராசிரியர்கள் மொழிபெயர்ப்பு செய்தனர். தமிழ்நாடு திரு அவையின் தனிப்பெரும் வார இதழான ‘நம் வாழ்வு’ பதிப்பகம் இதனை வெளியிட்டுள்ளது. விலை : ரூ.150/-

தொடர்புக்கு: ‘நம் வாழ்வு’ பதிப்பகம், 62, லஸ் கோவில் சாலை, மயிலாப்பூர், சென்னை - 600 004.

செல்: 94980 32244

கோவை மறைமாவட்டத்தில் உள்ள புனித செபமாலை அன்னை பசிலிக்கா தமிழ்நாட்டின் 7-வது பசிலிக்காவாகும். இந்தப் பசிலிக்காவின் வரலாறு 385 ஆண்டுகள் கொண்டதாகும். இங்கு வரும் மக்கள் ஏராளமானோர் அன்னையைத் தரிசித்து இறையேசுவின் வழியாக அருள் வரங்களைப் பெற்றுச் செல்கின்றனர்.

அன்னையின் அளவிட முடியாத அன்பும் அரவணைப்பும் வழிநடத்துதலும் பரிந்துரையும் ஒவ்வொரு மனிதரின் வாழ்விலும் நம்பிக்கை கீதங்களாக ஒளிர்கின்றன.

நம் அன்னையின் பெருவிழா வருகின்ற அக்டோபர் முதல் ஞாயிறு 5-ஆம் தேதி வெகு சிறப்பாக நடைபெற உள்ளது. இறைமக்கள் அனைவரும் பெரும் திரளாகக் கலந்து கொண்டு அன்னையின் வழியாக இறைமகன் இயேசுவின் அருளைப் பெற்றுச் செல்ல எம் மறைமாவட்ட அருள்தந்தையர்கள், இருபால் துறவியர்கள் மற்றும் எம் பங்கு மக்களோடு இணைந்து இறைவனின் ஆசிர்பெற உங்களை அன்புடன் அழைக்கின்றேன். அனைவருக்கும் திருவிழா நல்வாழ்த்துகள்!

கோவை மறைமாவட்டம், கருமத்தம்பட்டி புனித செபமாலை அன்னை பசிலிக்கா, மறைமாவட்டத்தின் முதல் தலைமை ஆலயமாக உருவானது. இந்த அழகுமிக்க பசிலிக்கா மறைமாவட்டத்திற்குப் பெரும் புகழைச் சேர்த்துக்கொண்டிருக்கிறது. அன்றிலிருந்து இன்று வரை திருப்பயணிகளின் கூட்டம் நிரம்பி வழிகின்றது. குறிப்பாக, ஒவ்வொரு மாதத்தின் முதல் சனிக்கிழமைகளில் திரளான பக்தர்கள் இங்கு வருகை புரிகின்றார்கள். பசிலிக்கா நம்மையும் இறைவனையும் மிக நெருக்கமாகச் சந்தித்து உரையாட வைத்து இறைவனின் அர்ச்சிப்பைப் பெற்றுக்கொண்டு நம்மைப் பிறருக்கு நல்ல மனிதர்களாக மாற்றுகின்ற ஓர் உன்னதமான இடம்.

இங்கு வரும் அனைத்து மக்களும் ஏராளமான வரங்களை மகிழ்ச்சியோடு பெற்றுச்செல்ல இந்த இறைவேண்டலின் வீடு துணைபுரிவதாக! இந்த ஆண்டு நடைபெறும் திருவிழாவிற்கு உங்கள் அனைவரையும் அன்புடன் வரவேற்கின்றேன். பசிலிக்கா அதிபர், அருள்தந்தையர்கள், பங்கு இறைமக்கள், வருகின்ற திருப்பயணிகள் அனைவருக்கும் திருவிழா நல்வாழ்த்துகளைத் தெரிவித்து மகிழ்கின்றேன்.

கோவை ஆயரின் ஆசியுரை

அன்புள்ளம் கொண்ட அருள்பணியாளர்களே! இருபால் துறவியரே! இறைமக்களே! ‘நம் வாழ்வு’ வாசகப் பெருமக்களே! இறை இயேசுவின் இனிய நாமத்தில் உங்கள் அனைவருக்கும் புனித செபமாலை அன்னையின் பெயரால் வாழ்த்துகளையும் செபங்களையும் உரித்தாக்கிக்கொள்கின்றேன். புனித செபமாலை அன்னை நம்மை அண்டி வருவோருக்கு எல்லாம் ஏராளமான நன்மைகளையும் புதுமைகளையும் வழங்கி வருகிறார். இறைநம்பிக்கையில் நிறைவை அடைய கத்தோலிக்கத் திரு அவையின் தலைமை நமக்குக் கொடுத்துள்ள மிகப்பெரிய கொடை கருமத்தம்பட்டி புனித செபமாலை அன்னை பசிலிக்கா, அனைத்து மதத்தினரும் சமய நல்லிணக்கத்துடனும் நம்பிக்கையுடனும் அடியெடுத்து வைக்கும் புண்ணிய பூமி. அன்னை மரியாவின் பரிந்துரையை நாடிவருவோரின் வேண்டுதல் நிறைவேறி அன்னையின் வழியாக இயேசுவுக்கு நன்றி செலுத்தும்போது பார்ப்பவரின் உள்ளத்திற்குள் பேரானந்தம் நிழலாடும்.

அக்டோபர் மாதம் என்றாலே செபமாலை செபிக்கும் மாதமாகும். எனவே, வருகின்ற அக்டோபர் முதல் ஞாயிற்றுக்கிழமை அன்று நடைபெறும் அன்னையின் பெருவிழாவில் நீங்கள் அனைவரும் திரளாகக் கலந்து கொண்டு அன்னையின் பரிந்துரை வழியாக இறையாசிரைப் பெற்றுச்செல்ல அன்புடனும் பாசத்துடனும் அழைக்கின்றேன்.  இறையாசிர்!