news-details
வத்திக்கான் செய்திகள்
“அரசியல் சுயநலத்தைக் கடந்து பொதுநலனுக்காகப் பணியாற்றுங்கள்” - திருத்தந்தை

தனது திருத்தூதுப் பயணத்தின் இரண்டாம் கட்டமாக அர்ஜென்டினாவைச் சென்றடைந்துள்ள திருத்தந்தை லியோ, நாட்டின் அரசியல் தலைவர்கள் உடனடி அரசியல் சுயலாபங்களைக் கடந்து, மக்களின் பொதுநலனுக்காகப் பணியாற்றவேண்டும் என வலியுறுத்தியுள்ளார். பியுனர்ஸ் அயர்ஸ் நகரில் உள்ள லிபர்டாட் மாளிகையில் அரசு அதிகாரிகள், தூதர்கள், குடிமைச் சமூகப் பிரதிநிதிகள் மத்தியில் உரையாற்றிய திருத்தந்தை, “அதிகாரமானது சேவை மனப்பான்மையோடு செயல்படுத்தப்படும்போதே உண்மையான மதிப்பைப் பெறுகிறது. பொருளாதார வளர்ச்சி நாட்டின் அனைத்துத் தரப்பு மக்களையும் குறிப்பாக, எளிய மற்றும் விளிம்புநிலை மக்களையும் சென்றடைய வேண்டும்” என்றார். மேலும், “இளையோர் வேலை தேடிச் சொந்த நாட்டை விட்டு வெளியேறும் அவலநிலை மாறவேண்டும். ஊழல், போதைப்பொருள் கடத்தல் மற்றும் மனிதக் கடத்தலுக்கு எதிராகத் தென் அமெரிக்க நாடுகள் ஒருங்கிணைந்து செயல்படவேண்டும். சனநாயக நிறுவனங்களைப் பலப்படுத்தி, மனித உயிர்கள் மற்றும் கருவறையில் உள்ள உயிர்களின் மாண்பைப் பாதுகாக்கத் தலைவர்கள் முன்வரவேண்டும்” என்றும் திருத்தந்தை லியோ வலியுறுத்தியுள்ளார்.