news
உலக செய்திகள்
‘நீரைப் பாதுகாப்போம்’

செப்டம்பர் 1-ஆம் நாள் ‘படைப்பைப் பராமரிப்பதற்கான 11-வது உலக இறைவேண்டல் நாளை’ முன்னிட்டு, உலகெங்கிலும் உள்ள கிறித்தவர்கள் ஒன்றிணைந்து சுற்றுச்சூழல் பாதுகாப்பு மற்றும் நீர் வளத்தைப் பாதுகாப்பதற்காக, சிறப்பு இறைவேண்டல் செய்யவேண்டும் என்று திருத்தந்தை லியோ அறிவித்துள்ளார். ‘திருத்தந்தையின் உலகளாவிய இறைவேண்டல் வலைப்பின்னல்’ வெளியிட்ட காணொளிச் செய்தியில் உரையாற்றிய அவர், “தண்ணீர் எல்லைகளற்ற உரிமையாகும்; அது அனைவருக்கும் உரிய பொதுவான கொடை” என்று வலியுறுத்தியுள்ளார். நீரை வணிகப் பொருளாக மாற்றுவதற்கும், விரையம் செய்வதற்கும் கண்டனம் தெரிவித்த திருத்தந்தை, சுத்தமான குடிநீருக்காக மைல் கணக்கில் நடந்து செல்லும் ஏழை எளிய மக்களின் துயரங்களைச் சுட்டிக்காட்டியுள்ளார். தண்ணீரை வீணாக்காமல் எளிமையான வாழ்முறையைக் கடைப்பிடிக்குமாறு கேட்டுக்கொண்ட அவர், ஏற்றத்தாழ்வுகளின்றி அனைவரும் அச்சமின்றித் தண்ணீரைக் குடிக்கும் உரிமையைப் பாதுகாக்க அழைப்பு விடுத்துள்ளார். மேலும், குழாய் கசிவுகளைச் சரிசெய்தல், நீரைக் குறைவாகப் பயன்படுத்துதல் மற்றும் நீர்நிலைகளை மாசடையாமல் தடுத்தல் போன்ற தனிநபர் பொறுப்புகளையும் முன்னெடுக்குமாறு திருத்தந்தை லியோ கேட்டுக்கொண்டுள்ளார். அக்டோபர் 4-இல் வரும் புனித பிரான்சிஸ் அசிசியாரின் திருவிழா வரை தொடரும் இக்காலகட்டத்தில், காலநிலை மாற்றத்தின் பேரழிவுகளிலிருந்து நமது பொதுவான இல்லமாகிய பூமியைப் பாதுகாக்கத் திரு அவை அழைப்பு விடுத்துள்ளது.

news
உலக செய்திகள்
“போர் ஒருபோதும் தீர்வைத் தராது”- ஆயர் பாவ்லோ மார்ட்டினெல்லி திட்டவட்டம்!

மத்தியக் கிழக்கில் போரும் பதற்றமும் நீடித்து வரும் நிலையில், “ஆயுதங்கள் ஒருபோதும் தீர்வை ஏற்படுத்தாது” என்று தெற்கு அரேபியாவின் திருத்தூது நிர்வாகி ஆயர் பாவ்லோ மார்ட்டினெல்லி வலியுறுத்தியுள்ளார். ஐக்கிய அரபு அமீரகம், ஓமன் மற்றும் ஏமன் ஆகிய நாடுகளை உள்ளடக்கிய இப்பகுதியில் வாழும் 10 இலட்சத்திற்கும் அதிகமான கத்தோலிக்கக் கிறித்தவர்கள், தற்போதைய அமெரிக்க-ஈரான் போர்ச் சூழலிலும் திரு அவைக்குத் தங்களின் ஆதரவையும் செபத்தையும் வழங்கி வருவதாக அவர் குறிப்பிட்டார். சவால்கள் நிறைந்த இக்காலத்தில் மக்கள் ஒருவருக்கொருவர் உதவிக்கொண்டு, இறைவேண்டலில் இணைந்து சிறப்பான சாட்சியமளித்து வருகின்றனர் என்றார். ரிமினி மாநாட்டில் திருத்தந்தை லியோவின் உரையின்படி ‘ஆயுதங்களற்ற அமைதி’ என்பது மிகவும் அவசியமானது என்று தெரிவித்தார். சொற்களையும், மனங்களையும், நாடுகளையும் ஆயுதங்களற்றதாக மாற்றுவதும், பொறுமையுடன் கூடிய உரையாடலை முன்னெடுப்பதுமே அமைதியான சகவாழ்விற்கான ஒரே வழி என்றும் ஆயர் மார்ட்டினெல்லி உறுதியாகத் தெரிவித்துள்ளார்.

news
உலக செய்திகள்
காங்கோவில் எபோலா பாதிப்பு: உலக நாடுகளின் உதவிக்குத் திருத்தந்தை வேண்டுகோள்!

காங்கோ ஜனநாயகக் குடியரசில் தீவிரமாகப் பரவி வரும் எபோலா வைரஸ் தொற்றால் பாதிக்கப்பட்ட மக்களுக்கு உதவிட உலக நாடுகள் உடனடியாக முன்வரவேண்டும் என்று திருத்தந்தை லியோ கோரிக்கை விடுத்துள்ளார். மேலும், “காங்கோவில் பரவி பல உயிர்களைப் பலிவாங்கி வரும் எபோலா தொற்றைக் கட்டுப்படுத்த, உள்ளூர் சமூகங்களை உள்ளடக்கிய உலகளாவிய தடுப்பு நடவடிக்கைகள் அவசியம்” என்று வலியுறுத்தியுள்ளார். இதுவரை 5,300-க்கும் மேற்பட்டோர் பாதிக்கப்பட்டுள்ள நிலையில், 2,500-க்கும் அதிகமானோர் உயிரிழந்துள்ளனர். தடுப்பூசி விநியோகம் நடைபெற்று வந்தாலும், அப்பகுதியில் நிலவும் ஆயுத மோதல்கள் நிவாரணப் பணிகளுக்குப் பெரும் சவாலாக உள்ளன. மேலும், மத்திய ஆப்பிரிக்கக் குடியரசின் ‘சாம்போயே’ (Zamboyé) பகுதியில் உள்ள தங்கச் சுரங்கத்தில் ஏற்பட்ட நிலச்சரிவில் சிக்கி 100-க்கும் மேற்பட்ட தொழிலாளர்கள் உயிரிழந்த நிகழ்விற்கும் திருத்தந்தை ஆழ்ந்த இரங்கலைத் தெரிவித்ததுடன், பலியானவர்களின் குடும்பங்களுக்கு ஆறுதல் கூறிய அவர், சுரங்கப் பணிகளில் தொழிலாளர்களின் பாதுகாப்பை உறுதி செய்யவேண்டும் என்றும் கேட்டுக்கொண்டுள்ளார்.

news
உலக செய்திகள்
“இடம்பெயர்ந்த குழந்தைகளின் கதறல் இறைவனை அடைகிறது” - திருத்தந்தை

2026, செப்டம்பர் 27 அன்று கத்தோலிக்கத் திரு அவையால் கொண்டாடப்படவுள்ள 112-வது ‘உலக இடம்பெயர்ந்தோர் மற்றும் அகதிகள் தினத்தை’ முன்னிட்டு திருத்தந்தை லியோ தனது சிறப்புச் செய்தியை வெளியிட்டுள்ளார். “இந்தச் சிறுவர்களில் ஒருவரையாவது...” என்ற மத்தேயு நற்செய்தி வசனத்தின் அடிப்படையில் இச்செய்தி அமைக்கப்பட்டுள்ளது. “உலகளாவிய இடம்பெயர்தலில் மிகவும் பாதிக்கப்படக்கூடியவர்களாகச் சிறுவர்களே உள்ளனர்” என்று கவலை தெரிவித்துள்ள திருத்தந்தை, “பெற்றோரை இழந்து, வன்முறைகளைக் கண்டு, குடும்பத்தை விட்டுப் பிரிந்து வாழும் அகதிச் சிறுவர்களின் மனித கண்ணியம் பல வழிகளில் மிதிக்கப்படுகிறது” என்றும் குறிப்பிட்டுள்ளார். “புலம்பெயர்ந்த குழந்தைகளின் கதறல் இன்று இறைவனைச் சென்றடைகிறது; இத்தகைய துயரங்களைக் கண்டு நாம் அமைதியாகவோ அல்லது பழகிப்போனவர்களாகவோ இருந்துவிடக் கூடாது. ஒவ்வொரு புலம்பெயர்ந்த சிறுவரையும் வெறும் புள்ளிவிவரமாகப் பார்க்காமல், அவர்களுக்குப் பாதுகாப்பு, கல்வி மற்றும் வாழ்வுரிமையை வழங்கவேண்டும்” எனக் கேட்டுக்கொண்டார்.

news
உலக செய்திகள்
“விளையாட்டு அமைதிக்கான தூதுவன்”- திருத்தந்தை லியோ

இத்தாலியின் தாரான்டோ நகரில் ஆகஸ்டு 21 முதல் செப்டம்பர் 3 வரை நடைபெற்று வரும் 20-வது மத்திய தரைக்கடல் விளையாட்டுப் போட்டிகளை முன்னிட்டு, திருத்தந்தை லியோ பகிர்ந்துள்ள தனது வாழ்த்துச் செய்தியில், “இப்போட்டிகள் மத்திய தரைக்கடல் பகுதி மக்கள் மத்தியிலும், உலக அளவிலும் அமைதி மற்றும் சகோதரத்துவத்தைப் பறைசாற்றும் ஓர் அடையாளமாகத் திகழவேண்டும்” என்று தெரிவித்துள்ளார். போட்டிகளை மனிதக் குடும்பத்தின் சந்திப்பாக மாற்றும்போது விளையாட்டு முழுமை பெறுகிறது என்றும் அவர் சுட்டிக்காட்டியுள்ளார். இப்போட்டிகளில் வத்திக்கானின் ‘அத்லெடிகா வத்திக்கானா’ அமைப்பைச் சேர்ந்த விளையாட்டு வீரர்களும் பங்கேற்கின்றனர். 26 நாடுகளைச் சார்ந்த சுமார் 4000 வீரர்கள் 33 விளையாட்டுப் பிரிவுகளில் போட்டியிடுகின்றனர்.

news
உலக செய்திகள்
“இளைஞர்களே, மாபெரும் கனவுகளைக் காணுங்கள்”- திருத்தந்தை

இளைஞர்கள் தனித்துவமான நம்பிக்கை, நோக்கம் மற்றும் சேவை உள்ளத்துடன் தைரியமாகக் கனவு காண ஊக்குவிக்கும் வகையில் திருத்தந்தை 14-ஆம் லியோ, இத்தாலியிலுள்ள அசிசி நகருக்குப் மேய்ப்புப்பணிப் பயணம் மேற்கொண்டார். ‘பிரான்சிஸ்கன் இளைஞர் சந்திப்பு’ என்ற நிகழ்வின் நிறைவாக அமையும் இந்தப் பயணத்தில், ஐரோப்பா முழுவதிலிருந்தும் வருகை தரும் 18 முதல் 33 வயதுடைய ஆயிரக்கணக்கான இளைஞர்களைத் திருத்தந்தை சந்திக்கவுள்ளார். புனித மேரி ஆஃப் தி ஏஞ்சல்ஸ் பேராலய வளாகத்தில் நடைபெறும் இந்நிகழ்வில், இளைஞர்களின் கேள்விகளுக்குப் பதிலளிக்கும் திருத்தந்தை, தொடர்ந்து சிறப்புத் திருப்பலியையும் தலைமை தாங்கிச் சிறப்பிக்கவுள்ளார். வாழ்க்கையின் விரக்தியினாலும், நவீனச் சவால்களினாலும் எதிர்காலத்தைக் குறித்துக் கனவு காணத் தவறும் இன்றைய இளைய சமுதாயத்திற்கு புனித பிரான்சிஸின் எளிமையான ‘புனிதமான தேடல் கொண்ட’ வாழ்க்கை முறை பெரும் வழிகாட்டியாக இருக்கும் என அமைப்பாளர்கள் தெரிவிக்கின்றனர்.